د کاپیسا، پروان او پنجشېر ولایتونو شاوخوا ۲۰۰ ورزشکارانو د سهشنبې په ورځ، د اکتوبر په ۶مه، په کاپیسا کې د غېږنیونې په سیالیو کې ګډون وکړ.
د کاپیسا د بدني روزنې او ورزش آمریت د معلوماتو له مخې، د دغو سیالیو موخه د مرکزي زون سیالیو لپاره د غوره ورزشکارانو پېژندل او غوره کول وو.
ورزشکارانو د سیالیو په بېلابېلو برخو کې له یو بل سره سیالي وکړه او د مرکزي زون سیالیو ته د لار موندلو لپاره یې خپل مهارتونه وازمایل.
ګډونوالو د دغه ډول سیالیو له جوړېدو هرکلی وکړ او په ولایتي کچه یې د لا ډېرو ورزشي سیالیو غوښتنه وکړه. هغوی وویل، د سیالیو د فرصتونو زیاتوالی کولای شي له ځوانو غېږنیونکو سره د خپلو وړتیاوو په وده کې مرسته وکړي.
د کاپیسا ورزشي مسوولانو وویل، د ورزشکارانو د ملاتړ او د هغوی د پرمختګ لپاره به نور ورزشي فعالیتونه هم ترسره کړي.
