اولي پوپ د افغانستان پریمیر لیګ له ډرافټه ووت؛ د انګلستان د کرکټ بورډ پر دریځ پوښتنې زیاتې شوې
د انګلستان د کرکټ ملي لوبډلې توپوهونکي اولي پوپ د افغانستان پریمیر لیګ د لومړي پړاو له ډرافټه خپل نوم ایستلی دی. دې پرېکړې په افغانستان کې د ښځو د حقونو، د انګلستان د کرکټ بورډ د تګلارې او په بهرنیو لیګونو کې د انګلیسي لوبغاړو د ګډون په اړه بحثونه بیا راپارولي دي.
د انګلستان د کرکټ ملي لوبډلې توپوهونکي اولي پوپ د افغانستان پریمیر لیګ د لومړي پړاو له ډرافټه خپل نوم ایستلی دی؛ هغه پرېکړه چې په افغانستان کې د ښځو د حقونو او د افغان کرکټ اړوند سیالیو کې د انګلیسي لوبغاړو د ګډون په اړه یې بحثونه تازه کړي دي.
د اکټوبر په ۱۳مه د آوټلوک د خپاره شوي راپور له مخې، ټاکل شوې د افغانستان پریمیر لیګ لومړی پړاو د روان کال په وروستیو کې په متحده عربي اماراتو کې ترسره شي.
پوپ تمه کېده چې په دغه ډرافټ کې د انګلستان یوازینی هغه لوبغاړی وي چې له خپل کرکټ بورډ سره مرکزي تړون لري.
د راپور له مخې، نوموړي د ګډون نه کولو پرېکړه په خپله کړې او دا ګام یې د انګلستان د کرکټ د مشر راب کي له مستقیمو خبرو وروسته نه دی اخیستی.
خو د پوپ تر پرېکړې مهمه پوښتنه دا ده چې د انګلستان د کرکټ بورډ ولې له افغانستان سره دوه اړخیزې نړیوالې سیالۍ نه تنظیموي، خو د افغانستان اړوند یوه سوداګریز لیګ کې د خپلو لوبغاړو د ګډون پرېکړه تر ډېره هغوی ته پرېږدي.
د انګلستان او وېلز کرکټ بورډ له ۲۰۲۱ کال راهیسې، کله چې طالبان بیا واک ته ورسېدل، له افغانستان سره د دوه اړخیزو سیالیو له تنظیمولو ډډه کړې ده.
د دې دریځ تر شا په افغانستان کې د ښځو او نجونو پر زدهکړو، کار او ورزشي فعالیتونو لګېدلي محدودیتونه دي.
سره له دې، د انګلستان ملي لوبډله د کرکټ نړیوالې شورا په سترو ټورنمنټونو کې د افغانستان پر وړاندې لوبې کوي.
همدا توپیر اوس د بحث یوه اساسي برخه ګرځېدلې ده.
د انګلستان د کرکټ مشر راب کي د بيبيسي د ټېسټ مېچ سپېشل په خپرونه کې ویلي چې بورډ یې د قانون له مخې په بهرنیو لیګونو کې د لوبغاړو د ګډون د مخنیوي محدود واک لري.
د هغه په وینا، دا موضوع تر ډېره د لوبغاړو په اخلاقي قضاوت پورې تړلې ده او هر لوبغاړی باید د خپلې پرېکړې مسؤلیت ومني.
راب کي دا هم څرګنده کړې چې که دی خپله د ورته پرېکړې پر وړاندې وای، په دغه لیګ کې به یې ګډون نه کاوه.
په بهرنیو سوداګریزو لیګونو کې د ګډون لپاره لوبغاړي عموماً د خپل کرکټ بورډ د نه اعتراض سند، یا NOC، ته اړتیا لري.
له همدې امله، د افغانستان پریمیر لیګ موضوع یوازې د لوبغاړو شخصي انتخاب نه دی، بلکې د انګلستان د کرکټ بورډ د اجازې ورکولو له تګلارې سره هم تړاو لري.
د پوپ له وتلو سره سره، د راپور له مخې، یو شمېر نور انګلیسي لوبغاړي لا هم د لیګ په ډرافټ کې شامل دي.
په دغو لوبغاړو کې د انګلستان پخوانی توپوهونکی ډېوېډ ملان، معین علي، جېمز وینس او جېمز ریو شامل دي.
ملان ویلي چې د سوداګریزو لیګونو له لارې عاید ترلاسه کوونکو لوبغاړو لپاره دا ډول پرېکړې اسانه نه دي.
د هغه په وینا، لوبغاړي کله ناکله د قانوني اجازې او اخلاقي دریځ ترمنځ له ستونزمن انتخاب سره مخ کېږي.
ملان دا پوښتنه هم راپورته کړې چې ولې د داسې موضوع پرېکړه یوازې لوبغاړو ته پرېښودل کېږي، په داسې حال کې چې انګلستان د کرکټ نړیوالې شورا په سیالیو کې له افغانستان سره لوبو ته دوام ورکوي.
د افغانستان د کرکټ لپاره دا بحث ځانګړی اهمیت لري.
له یوې خوا د افغانستان د نارینهوو ملي لوبډله په نړیوالو سیالیو کې فعاله ده او د هېواد د کرکټ سوداګریزې پروژې د پراختیا هڅې روانې دي؛ له بلې خوا په افغانستان کې د ښځو او نجونو پر ورزشي فعالیتونو محدودیتونه د نړیوالو کرکټي ادارو او لوبغاړو د بحث موضوع پاتې دي.
د افغانستان پریمیر لیګ ته د انګلیسي لوبغاړو د ورتګ یا نه ورتګ مسئله له همدې امله یوازې د یوه ټورنمنټ تر بریده نه محدودېږي.
دا بحث د نړیوال کرکټ د ادارو د دریځونو، د لوبغاړو د مسلکي ګټو او د بشري حقونو په اړه د هغوی د مسؤلیتونو ترمنځ د توپیرونو څرګندونه کوي.
د اولي پوپ پرېکړې تر اوسه د انګلستان د نورو لوبغاړو لپاره کومه ګډه تګلاره نه ده رامنځته کړې، خو یو ځل بیا یې دا پوښتنه راپورته کړې چې د ورته حساسو موضوعاتو په اړه وروستۍ پرېکړه باید د لوبغاړو شخصي انتخاب وي او که د کرکټ د ادارو روښانه پالیسي.
