کابل کې د هاکي ټاکنیزې سیالۍ پیل شوې؛ ۳۶ لوبغاړي به غوره شي
په کابل کې د نهو لوبډلو ترمنځ د هاکي دوه ورځنۍ ټاکنیزې سیالۍ پیل شوې، چې په پایله کې به یې د درېیو بېلابېلو لوبډلو لپاره ۳۶ لوبغاړي غوره شي. د سیالیو په لومړۍ لوبه کې د استاد شاه محمود شهید کلب خالد بن ولید ته ۵ پر ۴ ماتې ورکړه.
په کابل کې د هاکي ټاکنیزې سیالۍ د نهو لوبډلو په ګډون پیل شوې، چې موخه یې د تنکیو ځوانانو، ځوانانو او د کابل د هاکي منتخبې لوبډلې لپاره د ۳۶ لوبغاړو غوره کول دي.
دغه دوه ورځنۍ سیالۍ د شنبې په ورځ، د ۱۴۰۵ کال د تلې په ۲۵مه، د هېواد د ورزش ادارې په ۵۰۰ کسیز جمنازیوم کې پیل شوې.
په سیالیو کې د کابل ښار د څلورو کلبونو او د ښوونیزو بنسټونو پنځه لوبډلې ګډون لري.
دا ټورنمنټ د هاکي ملي فدراسیون او په مدرسو، ښوونځیو او پوهنتونونو کې د ورزش د ودې ریاست له خوا، د کابل ولایت د بدني روزنې او ورزش ریاست په همغږۍ جوړ شوی دی.
د ورزش ادارې د معلوماتو له مخې، د سیالیو په پای کې به د مدرسو، ښوونځیو او پوهنتونونو له پنځو لوبډلو څخه ۱۲ لوبغاړي د تنکیو ځوانانو او ۱۲ نور د ځوانانو لوبډلې ته غوره شي.
همدارنګه به د څلورو کلبونو له لوبډلو څخه ۱۲ لوبغاړي د کابل د هاکي منتخبې لوبډلې لپاره وټاکل شي.
په دې توګه به ټولټال ۳۶ لوبغاړي د درېیو بېلابېلو لوبډلو لپاره غوره شي.
د سیالیو لومړۍ لوبه د خالد بن ولید او استاد شاه محمود شهید کلبونو ترمنځ ترسره شوه.
په دې لوبه کې د استاد شاه محمود شهید کلب لوبډلې خپل سیال خالد بن ولید ته د ۵ پر ۴ ګولونو په پایله کې ماتې ورکړه او د ټورنمنټ لومړۍ بریا یې خپله کړه.
د سیالیو د پیل په مراسمو کې د هېواد د ورزش ادارې ورزشي سلاکار قاري حیاتالله رحماني، د هاکي ملي فدراسیون رئیس عبدالله مایار نورستاني او په مدرسو، ښوونځیو او پوهنتونونو کې د ورزش د ودې ریاست رئیس مولوي نقیب احمد الفت ګډون کړی و.
ورزشي مسؤلین، ورزشکاران او د رسنیو استازي هم د دغو مراسمو برخه وو.
د سیالیو د جوړوونکو په وینا، د دې ټورنمنټ موخه د غوره استعدادونو موندل او د هاکي ورزش وده ده.
د ښوونیزو بنسټونو او کلبونو ګډون د دې زمینه برابروي چې د بېلابېلو عمرونو او ورزشي کچو لوبغاړي د ټاکنیزو سیالیو له لارې خپلو اړوندو لوبډلو ته د لار موندلو فرصت ترلاسه کړي.
ټاکل شوې چې دغه سیالۍ دوه ورځې دوام وکړي او د غوره شویو لوبغاړو نومونه د ټاکنیز بهیر له بشپړېدو وروسته څرګند شي.
