روسیه د افغان پارالمپیک ورزشکارانو لپاره تمریناتي کمپونه برابروي
د روسیې د پارالمپیک کمېټې رئیس پاول الکسیویچ روژکوف ویلي چې په خپل هېواد کې به د افغان پارالمپیک ورزشکارانو لپاره د تمریناتي کمپونو او تمریناتي سیالیو زمینه برابره کړي. نوموړي دا څرګندونې د افغانستان د المپیک، بدني روزنې او ورزش له عمومي رئیس مولوي احمدالله وثیق سره د لیدنې پر مهال کړې دي.
د روسیې د پارالمپیک کمېټې رئیس پاول الکسیویچ روژکوف ویلي، چې په دغه هېواد کې به د افغانستان د پارالمپیک ورزشکارانو لپاره د تمریناتي کمپونو او تمریناتي سیالیو د ترسره کولو زمینه برابره کړي.
د افغانستان د بدني روزنې او ورزش عمومي ریاست د شنبې په ورځ، د لړم په دویمه، راپور ورکړ چې د افغانستان د المپیک، بدني روزنې او ورزش عمومي رئیس مولوي احمدالله وثیق له خپل مل پلاوي سره د روسیې د پارالمپیک کمېټې له رئیس سره لیدلي دي.
د افغان ورزشکارانو لپاره د تمرین زمینه
د ورزش ادارې د راپور له مخې، روژکوف په دې لیدنه کې ویلي چې معلولیت لرونکو ورزشکارانو ته باید لازمې اسانتیاوې برابرې او د هغوی د ورزشي فعالیتونو ملاتړ وشي.
نوموړي زیاته کړې چې د افغان پارالمپیک ورزشکارانو لپاره به په روسیه کې د تمریناتي کمپونو او تمریناتي سیالیو د جوړېدو زمینه برابره کړي.
دغه وړاندیز، که عملي شي، افغان ورزشکارانو ته د منظمو تمرینونو او ورزشي تجربو د ترلاسه کولو فرصت برابرولی شي.
خو د افغانستان د ورزش ادارې په خپاره شوي راپور کې د دغو کمپونو او سیالیو د ترسره کېدو نېټه، د ګډونوالو شمېر او اړوندې ورزشي څانګې نه دي مشخصې شوې.
د لیدنې او وړاندیز شویو تمریناتي پروګرامونو معلومات د افغانستان د بدني روزنې او ورزش عمومي ریاست خپاره کړي دي.
