افغانستان به د نړیوال جمناسټیک فدراسیون (FIG) په ۸۶م کانګرس کې ګډون وکړي، چې په همدې موخه د افغانستان د جمناسټیک ملي فدراسیون عمومي منشي فردین امید جلالي د تایلنډ پلازمېنې بنکاک ته تللی دی.
دغه کانګرس د اکتوبر په ۴مه او ۵مه نېټه ترسره کېږي او د نړیوال جمناسټیک فدراسیون د غړو هېوادونو د فدراسیونونو استازي به پکې د خپلو فعالیتونو په اړه راپورونه وړاندې کړي او د جمناسټیک د راتلونکو پلانونو په اړه بحث وکړي.
د افغانستان لپاره د دې ګډون ارزښت یوازې په یوه رسمي سفر کې نه محدودېږي. دا غونډه د افغانستان د جمناسټیک فدراسیون ته فرصت ورکوي چې د نړیوال فدراسیون په رسمي بحثونو کې حضور ولري او له نورو غړو فدراسیونونو سره مستقیمې اړیکې او خبرې ولري.
د سفر تر مخه، جلالي د بدني روزنې او ورزش عمومي ریاست له تخنیکي او مسلکي مرستیال حافظ احمد جان ځدراڼ سره هم وکتل. ځدراڼ نوموړي ته د کانګرس په ګډون کې د بریا هیله وکړه.
